Сям’я Шарэндаў і адвакат Павал Алесік (справа) у судзе

Паліне стала вядома, ад супрацоўнікаў ІЧУ, што раніцай яе мужа вязуць у суд.

Справу разглядаў суддзя Маскоўскага раёна г. Брэста Раман Карабан. Андрэй Шарэнда запатрабаваў адваката. Суддзя абвесціў перапынак да 16 гадзін на заключэнне дамовы з адвакатам. Актывіста павезлі назад у ІЧУ.

Суд працягнуўся пасля 16 гадзін. Інтарэсы Андрэя Шарэнды прадстаўляў адвакат Павал Алесік. Суддзя даў 20 хвілін на азнаямленне з матэрыяламі справы. Грамадзкаму актывісту ўменялась парушэнне ч.3 арт 23.34 КаАП. З матэрыялаў справы: “В ходе осмотра перепіскі чата “Брест для Жізні”” ў тэлеграм быў вылучаны запіс за 14 ліпеня а 21:00: “Усе ідзем на ЦУМ”, які, як было выяўлена, належыць Андрэю Шарэндзе”.

Падчас разгляду справы суддзя Карабан адрынуў усе хадайніцтвы і довады прыцягваемага да адказнасці грамадзкага актывіста і абароны. Між іншым далучыць да гэтай справы абвінавачванне Шарэнды ў парушэнні арт. 23.4 “непадпарадкаванне”. Андрэй сцвярджае, што на яго быў складзены пратакол па гэтым артыкуле. Суддзя адмовіў: “У матэрыялах справы гэтага пратаколу няма”.

У выніку актывіст Эўрапейскай Беларусі Андрэй Шарэнда атрымаў максімальнае па артыкуле 23.34 пакаранне – 15 сутак адміністратыўнага арышту.

Праваабаронца Уладзімір Вялічкін лічыць, што Андрэя чакае яшчэ адно пакаранне ў 15 сутак пасля адбыцця сёняшняга пакарання. Праваабаронца нагадвае, што такім чынам расправілісь з яшчэ адным удзельнікам падзей 14 ліпеня Дзянісам Сарокам. Той адседзеў 15 сутак паводле 23.34, прывезлі у суд і далі яшчэ 15 – паводле 23.4.

“Адміністратыўнымі арыштамі ўлады намагаюцца ізаляваць на час выбараў сама актыўных грамадзян і шляхам заляквання паўстрымаць беларускае грамадзтва ад пратэстаў напрыканцы выбараў, - кажа праваабаронца, - і гэта ня ўсё. Міліцыя цікавіцца шэрагам іншых актывістаў”.